9. ภารทฺวาชตฺเถรคาถา
[177]
‘‘นทนฺติ เอวํ สปฺปญฺญา, สีหาว คิริคพฺภเร;
วีรา วิชิตสงฺคามา, เชตฺวา มารํ สวาหนิํ [สวาหนํ (พหูสุ)]ฯ
[178]
‘‘สตฺถา จ ปริจิณฺโณ เม, ธมฺโม สงฺโฆ จ ปูชิโต;
อหญฺจ วิตฺโต สุมโน, ปุตฺตํ ทิสฺวา อนาสว’’นฺติฯ
… ภารทฺวาโช เถโร…ฯ
10. กณฺหทินฺนตฺเถรคาถา
[179]
‘‘อุปาสิตา สปฺปุริสา, สุตา ธมฺมา อภิณฺหโส;
สุตฺวาน ปฏิปชฺชิสฺสํ, อญฺชสํ อมโตคธํฯ
[180]
‘‘ภวราคหตสฺส เม สโต, ภวราโค ปุน เม น วิชฺชติ;
น จาหุ น จ เม ภวิสฺสติ, น จ เม เอตรหิ วิชฺชตี’’ติฯ
… กณฺหทินฺโน เถโร…ฯ
วคฺโค ตติโย นิฏฺฐิโตฯ
ตสฺสุทฺทานํ –
อุตฺตโร ภทฺทชิตฺเถโร, โสภิโต วลฺลิโย อิสิ;
วีตโสโก จ โย เถโร, ปุณฺณมาโส จ นนฺทโก;
ภรโต ภารทฺวาโช จ, กณฺหทินฺโน มหามุนีติฯ
4. จตุตฺถวคฺโค
1. มิคสิรตฺเถรคาถา
[181]
‘‘ยโต อหํ ปพฺพชิโต, สมฺมาสมฺพุทฺธสาสเน;
วิมุจฺจมาโน อุคฺคจฺฉิํ, กามธาตุํ อุปจฺจคํฯ
[182]
‘‘พฺรหฺมุโน เปกฺขมานสฺส, ตโต จิตฺตํ วิมุจฺจิ เม;
อกุปฺปา เม วิมุตฺตีติ, สพฺพสํโยชนกฺขยา’’ติฯ
… มิคสิโร เถโร…ฯ
2. สิวกตฺเถรคาถา
[183]
‘‘อนิจฺจานิ คหกานิ, ตตฺถ ตตฺถ ปุนปฺปุนํ;
คหการํ [คหการกํ (สี. ปี.)] คเวสนฺโต, ทุกฺขา ชาติ ปุนปฺปุนํฯ
[184]
‘‘คหการก ทิฏฺโฐสิ, ปุน เคหํ น กาหสิ;
สพฺพา เต ผาสุกา ภคฺคา, ถูณิกา [ถูณิรา (ปี. ก.), ธุณิรา (สฺยา.)] จ วิทาลิตา [ปทาลิตา (สี. สฺยา.)];
วิมริยาทิกตํ จิตฺตํ, อิเธว วิธมิสฺสตี’’ติฯ
… สิวโก [สีวโก (สี.)] เถโร…ฯ
3. อุปวาณตฺเถรคาถา
[185]
‘‘อรหํ สุคโต โลเก, วาเตหาพาธิโต [… พาธิโต (ก.)] มุนิ;
สเจ อุณฺโหทกํ อตฺถิ, มุนิโน เทหิ พฺราหฺมณฯ
[186]
‘‘ปูชิโต ปูชเนยฺยานํ [ปูชนียานํ (สี.)], สกฺกเรยฺยาน สกฺกโต;
อปจิโตปเจยฺยานํ [อปจนียานํ (สี.), อปจิเนยฺยานํ (สฺยา.)], ตสฺส อิจฺฉามิ หาตเว’’ติฯ
… อุปวาโณ เถโร…ฯ
4. อิสิทินฺนตฺเถรคาถา
[187]
‘‘ทิฏฺฐา มยา ธมฺมธรา อุปาสกา, กามา อนิจฺจา อิติ ภาสมานา;
สารตฺตรตฺตา มณิกุณฺฑเลสุ, ปุตฺเตสุ ทาเรสุ จ เต อเปกฺขาฯ
[188]
‘‘อทฺธา น ชานนฺติ ยโตธ ธมฺมํ, กามา อนิจฺจา อิติ จาปิ อาหุ;
ราคญฺจ เตสํ น พลตฺถิ เฉตฺตุํ, ตสฺมา สิตา ปุตฺตทารํ ธนญฺจา’’ติฯ
… อิสิทินฺโน เถโร…ฯ